كويت ريفيو (KR) عربي

آيماك 27 ولا ماك بوك برو 15 ؟

في الأسابيع اللي طافت، ماخليت فيديو عن الأيماك والماك بوك الا وشفته، علشان اتخذ القرار المصيري في حياتي الكمبيوترية، للحين اعتبر القرار غير معروف، ساعات اشوف الماك بوك برو افضل حالياً من الأيماك الـ27 انش، لأن الأخير فيه مشاكل تصنيعية ماادري اذا أبل حلوا هذه المشاكل، وبنفس الوقت انا من النوع اللي مايحب اللابتوبات نهائياً وخصوصاً كيبوردات اللابتوبات، بعد تجربتي الفاشلة مع لابتوب أيسر.

المشكلة أن الأيماك الـ27 انش والماك بوك برو الـ15 انش نفس السعر بالضبط وهو 2399 دولار، يعني 680 دينار تقريباً، اما المواصفات فطبيعي الأيماك اقوى من كل النواحي، لكن مشكلته مثل ماقلت وهي العيوب المصنعية، يعني لاسمح الله طلبت الجهاز وطلع فيه عيب مصنعي، مو اعرف حظي شلون صاير، فتكاليف الشحن الى الكويت راح تكلفني 80 دينار وطالع، فمابالكم اذا رديته مرة ثانية لأمريكا حق الإستبدال أو للإستفادة من الكفالة، والجهاز مو مال اني اطلبه من برا مع هالمشاكل المصنعية.

-

المشكلة الأخرى وهي بالماك بوك برو ان كيبورده مو عربي، حاولت ادور بالمواقع عن كيبورد عربي ماحصلت الا كفر احطه فوق اللابتوب ومجربه هالكفر عند صاحبي ونوعاً ما يبط الجبد حق واحد مثلي، لأني مااحس بالنغمة الحلوة من صوت الكيبورد لمن تطقطق فيه، وتكلفة استبدال الكيبورد بالكويت هني تكلف تقريبا مابين 70 دينار الى 90 دينار، ماادري صانيعهم من ذهب ولا فضة، فتوصلنا الى الحل التالي: اشتري ماك بوك برو حالياً، اذا اعجبني الماك كنظام واستخدام، اشتري الأيماك الـ27 انش، يعني صايدها 

-

iMac at iCity

رحت اليوم الى اي سيتي علشان اشوف اسعار الايماك وكانت الاسعار تبدأ من 450 دينار للـ20 انش الى 875 دينار لأعلى المواصفات، كان فيه اربع موديلات، والافضل كان بـ875 دينار، وهو الجهاز اللي ركزت عليه لأني قاعد ادور عليه

Dell: Latitude Z 600

مادري ليش عجبني هاللابتوب، بس سعره غالي حبتين على لابتوب يستخدم الويندز كنظام تشغيل، لكن اهم ماجذبني فيه هو تصميمه الحلو والعجيب بنفس الوقت، مواصفات اللابتوب رائعة، يعني البروسسر انتل كور 2 دو، والرامات 2 قيقا وطالع، ومساحة التخزين 64 قيقا*، كرت الشاشة من انتل، وسعر الجهاز 1799 دولار، يعني اللي يشتريه ويخلي الماك برو .. ماعنده سالفة.

-

تابع قراءة الموضوع لمشاهدة صور وفيديو من ديل عن اللابتوب

المزيد »

Praxis Slim Air

صديق ارسل لي وصلة عن هاللابتوب الجديد المذكور اسمه بالعنوان، شكله حلو وضعيف مثل الماك اير، البروسسر انتل اتوم 1.6 واتوقع انه يمشي الحال حق الإستخدام الخفيف، الجهاز راح يكون سعره 586 دولار وراح ينزل بشهر اكتوبر

HP Envy 13 and 15

هالجهاز جديد للحين مانزل بالسوق، واحتمال ينزل بـ15 اكتوبر، طبعاً راح يكون في نوعين، 15 إنش و 13 انش، ابو 13 هذا منزلينه متحلفين بلابتوب ماك أير، اما النوع الثاني 15 انش، هذا يبون كل اللابتوبات في العالم، بروسسر قوي، ورامات توصل الى 16 قيقا، والأسعار المتوقعة للجهازين هي 1700 دولار لـ إنفي 13، ام إنفي 15 راح يكون بـ1800 دولار، طبعاً هالفرق البسيط ماراح تشوفونه بالكويت، اذا ماخلوا الفرق مية دينار، طبعاً خل نشوف جم راح يكون السعر بالأول.