كويت ريفيو (KR) عربي

Movie: Avatar

امس الساعة ٩ ونص، دخلت انا وواحد من الشباب للهفلم، وماكنت ادري انه ينعرض لأول مرة على شاشة ايماكس وثري دي، لأن اخر مرة دشيت فلم جذي كان بالمركز العلمي قبل جم سنة، ووزعوا علينا النظارات ولبسناها حسيت اني عايشة المرطة على هالنظارات المرض، والفلم شقنا شق من طوله، طلعت منه ابجي بسبب النظارات اللي تذبح العين، والترجمة اللي قاطينها بحظني زين زين اقراها، كان المفروض النظارة يكون فيها اختيار تشيل الترجمة او تخليها، مو يحطونها على الشاشة، بعدين فلم بس مخلوقات لونها ازرق، باسوا بعض تقطع اللقطة ليش، للهدرجة خايفين علينا من الانحراف، عاد ياليت تقطيع سنع .. جنه واحد قاعد يحط ايده قبل لاتطلع اللقطة وتصير الشاشة سودة ومانشوف شي.

===

الفلم بمجمله حلو وقصته حلوة حيل، توريكم ان الإنسان شلون طماع ولا يهمه شي الا الطمع، يوريكم شلون البشر يتعاملون مع الكائنات الثانية حتى لو كانوا متشابهين بأغلب الصفات، لكن الطمع يعمي الإنسان للحصول على مايريد بغض النظر عن النتائج، الفلم يستاهل ٩ ونص من ١٠ ويستاهل انك تشوفه بسينما أيماكس بس مو بالكويت، شوفوا لكم ديرة ثانية شوفوه وردوا احسن لكم

Movie: Tenderness

حبيت هالفلم، وانصح الكل انهم يشوفونه، الفلم يتكلم عن واحد مريض نفسي يذبح اهله وعمره 15 سنة، بعد ما كمل الـ18 من عمره، اطلقوا سراحه، وفي الجهة الأخرى في بنت تحبه وقاعدة تنطره، ويتقابلون بالفلم وتبدأ الأحداث المشوقة بعد المقابلة، فلمعرفة المزيد، شوفوا الفلم .. مابي احرقه عليكم

Dear Zachary: A Letter to a son about his father

مو من طبعي اشوف افلام وثائقية، يعني اخر فلم شفته وثائقي كان اسمه الأرض من انتاج بي بي سي، بس هذا الفلم غير لأن المادة كانت متواجدة عندهم من صور وافلام وكان كل اللي عليهم يضبطونها ويذكرون الأحداث بالفلم بالتسلسل، القصة رائعة جداً وتستحق المشاهدة وقضاء امسية حزينة، لأن القصة جداً حزينة وشلون القضاء المفروض يوقف مع المظلوم، لكنه وقف مع المجرمين ضد الضحايا. اضغط هنا لمشاهدة المزيد من المعلومات عن هالفلم.

Movie: Inglourious Basterds

أحسن فلم بسنة 2009، كوميدي بشكل اخر، وبراد بيت بدع بالدور، انصح الجميع بمشاهدته

ARGOSY Media Player

قريت قبل شوي موضوع الأخ فرانكوم في مدونته عن جهاز ويسترن ديجيتال ميديا بلاير، اجهزة الميديا بلاير بإختصار هي اجهزة تعرض الأفلام والصور والملفات الصوتية عبر التلفزيون، حسب جودة الفيديو او الصورة، وحسب نوع التلفزيون، الجهاز اعلاه يمتاز بأنه تقدر تحط الترجمة بملف بروح بإمتداد أس ار تي*، يعني ماله داعي تحط الترجمة على الفلم نفسه وتوهق عمرك اذا فيها غلط الترجمة.

0

الجهاز  اللي تشوفون صورته فوق، شريته تقريباً من قبل سنة من حولي بقيمة 30 دينار وحجم الهاردسك 320 قيقا، والتورنت شغال 24 ساعة، انزل بهالأفلام واحطها بالهاردسك واشوفها، لدرجة انني قمت اروح السينما للأفلام اللي مافيها تقطيع اكثر من اللازم، فقمت اشوف الفلم اللي ابي، وبالوقت اللي ابي، مع الترجمة الرائعة. اللي يبي يعرف زيادة عن هالجهاز يضغط هني

0

* .srt