Sony Ericsson XPERIA X10
المصدر: جي اس ام ارينا
جهاز جديد من سوني اريكسون تم تغيير نظام التشغيل فيه من وندز الى اندرويد المدعوم من قوقل، مما يعني اننا راح نشوف جهاز محترم مايعلق مع كل لمسة او يطفي، او يرد عليك: مالي خلق اسوي اللي تبيه سو رستات ولا طقني بالطوفة، مواصفات الجهاز رائعة ماعدا سيئة واحدة وهي عدم وجود كيبورد (لوحة مفاتيح بلغة اخرى)، طبعاً هالشي وياي راح يؤدي الى اخطاء املائية وبدليات للراس بحكم الخبرة السابقة مع جهاز الأيفون، بالإضافة الى ميزة اساسية رائعة، وهي ان سرعة الجهاز هي الأسرع بين الأجهزة الأخرى، تحديداً الأيفون الجديد بو حرف إس، والسوني اريكسون مو لازم تنافس الأيفون نهائياً، لأن مستواها اكبر من الأيفون، كان المفروض تنزل الـبي اس بي للملعب وينافس الأيفون بدال هالنطرة على جهاز تقول تلفزيون من كبر الشاشة.
يوم 5 نوفمبر, 2009 لا توجد ردود موبايلات
Dear Zachary: A Letter to a son about his father
مو من طبعي اشوف افلام وثائقية، يعني اخر فلم شفته وثائقي كان اسمه الأرض من انتاج بي بي سي، بس هذا الفلم غير لأن المادة كانت متواجدة عندهم من صور وافلام وكان كل اللي عليهم يضبطونها ويذكرون الأحداث بالفلم بالتسلسل، القصة رائعة جداً وتستحق المشاهدة وقضاء امسية حزينة، لأن القصة جداً حزينة وشلون القضاء المفروض يوقف مع المظلوم، لكنه وقف مع المجرمين ضد الضحايا. اضغط هنا لمشاهدة المزيد من المعلومات عن هالفلم.
يوم 4 نوفمبر, 2009 لا توجد ردود افلام
List of Tax Free Goods
هذي قائمة بالسلع المعفية من الضريبة الجمركية (أضغط هنا)
فإذا طالبوك ارامكس او غيرهم بالـ5% رسوم جمركية على شحناتكم، وكانت شحناتكم موجودة بهاللستة، عطوهم هاللستة.
يوم 31 أكتوبر, 2009 لا توجد ردود عام واخبار
Coming Soon: Nokia N97 Mini
قبل شوي قريت عن هالجهاز بموقع انجادجت، والجهاز راح ينزل بالأسواق العالمية مع بداية الشهر القادم، مع العلم بأن الجهاز هو نسخة مصخرة من جهاز يحمل نفس الإسم طرح قبل سنة بالضبط في نوفمبر 2008، ويفرق هذا الجهاز المصغر عن الآخر فقط في الأبعاد والوزن وشاشة أصغر بحجم ماله داعي ينذكر لأن اصغر بشكل بسيط جداً، اما عن المساحة التخزينية الداخلية في هذا الجهاز هي 8 قيقابايت، والقديم كان 32 قيقا بايت، اما المواصفات الثانية مثل الكاميرا والجي بي اس فهي مثل القديم بالضبط، والتغييرات هي مجرد اللي قلتها، والجهاز حسب موقع انجادجت راح يكون سعره حوالي 667$ دولار، طبعاً لازم تنقص منه من 400 دولار الى 450 دولار وتشيل علامة الدولار ويصير سعره بالكويت !
يوم 28 أكتوبر, 2009 لا توجد ردود موبايلات